რას ვშვრებით, როცა რაღაც არ ვიცით და პასუხი გვჭირდება? რა თქმა უნდა! ვგუგლავთ. შეგვიძლია ეს შეკითხვაც დავგუგლოთ და წამში 30000-მდე პასუხს მივიღებთ... და ამ დროს, ალბათ არასდროს დაგვიგუგლავს თავად GOOGLE –  ერთი შეხედვით მარტივი, თეთრი ვებგვერდის ისტორია ცოტამ თუ იცის. დღეს, 27 სექტემბერს ის 23 წლის გახდა. 

ამ ბლოგში გუგლის ისტორიასთან ერთად, გაგიზიარებ 5 პრინციპს, რომელსაც მისი მარკეტინგული კამპანიები ეფუძნება.

ისტორია

გუგლის ამბავი 1995 წელს სტენფორდის უნივერსიტეტში დაიწყო, როცა სტუდენტმა ლარი პეიჯმა დისერტაციის თემად გლობალური ციფრული ქსელის მათემატიკური თვისებების გამოკვლევა აირჩია. მოგვიანებით მას ამ საქმეში ასპირანტი სერგეი ბრინსი შეუერთდა. მონაცემთა ბაზის გასანაწილებლად მათ PageRank ტექნოლოგია გამოიყენეს, რამაც გაამართლა. სამეცნიერო პროექტს Backbub ეწოდა, შემდგომში კი GOOGLE-ად გადაკეთდა. სინამდვილეში, ეს უნდა ყოფილიყო GOOGOL, რაც მათემატიკური ტერმინია და ნიშნავს ციფრ 1-ის მიმდევრობით მოყოლებული ასი ნულის ჩაწერას და სურდათ, სიმბოლურად ასე გამოეხატათ 1 ადამიანის მიერ უამრავი ინფორმაციის მოძიების შესაძლებლობა, თუმცა ინვესტირებისთვის მომზადებულ დოკუმენტში ასოთა თანმიმდევრობა აერიათ და გაჩნდა GOOGLE.

კომპანიის პირველი ოფისი კალიფორნიაში მდებარე ერთი პატარა ღარიბული ავტოფარეხი იყო. დღეს, გუგლის შემოსავალი $181.69 მილიარდს შეადგენს და მისი ოფისიც ერთი დიდი სანახაობაა. 

გაკვეთილები GOOGLE-ისგან

დღეს „გუგლი“ არის არამარტო „ყოვლისმცოდნე სივრცე“ ნებისმიერი ადამიანისთვის, არამედ ერთ-ერთი საუკეთესო ადგილი რეკლამის განსათავსებლად. თავად გუგლიც ციფრული რეკლამის დიდოსტატად ითვლება. 

GOOGLE-ის მედიის ხელმძღვანელი გრეის ლიაუ ჰყვება, რომ მისი გუნდი, კამპანიის დაგეგმვისას ორიენტირებულია პერსონალიზაციაზე, რაც მიზნად ისახავს მომხმარებლის ინტერაქციის გაზრდას. 

„დღევანდელი მომხმარებელი უფრო ჭკვიანია, ვიდრე ოდესმე. მათ იციან, რა უნდათ. ატარებენ კვლევას, რათა იპოვონ საუკეთესო... რაც მარტივია, როცა სამყარო შენს ხელთაა. ეს ყველაფერი ნიშნავს იმას, რომ ჩვენი, როგორც მარკეტინგის მენეჯერების როლი გაიზარდა. კამპანიებში მომხმარებლის ჩართვა და სწორი საშუალებების გამოყენება, სწორი შეტყობინებების მიწოდება, ყოველთვის ჩვენი მთავარი ამოცანა იყო. დღევანდელი ელვისებური ტემპი განახლებულ მიდგომებს მოითხოვს. ამ ყველაფერში კი პერსონალიზაციას გადამწყვეტი ადგილი უჭირავს.

მარკეტინგის მენეჯერების შრომას აზრი რომ ჰქონდეს, თითოეული მედია არხის როლი უნდა ესმოდეთ და ისიც უნდა იცოდნენ, თუ სად იკვეთებიან ისინი. 

აქ მოცემულია ხუთი ძირითადი პრინციპი, რომელსაც მე და ჩემი გუნდი ვიცავთ“:

1. დააყენე მომხმარებელი პირველ ადგილზე

„საუკეთესო მარკეტინგული ნამუშევარი ბრენდის ირგვლივ არ ტრიალებს – მისი მიზანი ჩვენი მომხმარებლების ცხოვრების გაუმჯობესებაა. ამისათვის ჩვენ სწორი Insight-ები უნდა ვიპოვოთ.“

მაგალითი

ინდოეთში, მომხმარებლები Google maps ხანგრძლივი მოგზაურობის წინ იყენებდნენ და აღმოჩნდა, რომ მისი სხვა ფუნქციების – რეალურ დროში ტრეფიკის განახლებებისა და მარშრუტის ალტერნატიული შემოთავაზებების შესახებ არ იცოდნენ. 

ამ პრობლემის გადასაჭრელად, გუნდმა ჩაატარა კამპანია #LookBeforeYouLeave, რათა მგზავრებისთვის შეეხსენებინათ, რომ გასვლამდე შეამოწმონ Google Maps-ი რეალურ დროში. ინტეგრირებული მედია კამპანია გადიოდა ციფრულ (ონლაინ ვიდეო და სოციალურ) და ტრადიციულ (რადიო, ტელევიზია და OOH) არხებზე ინდოეთის რვა მთავარ ქალაქში (მუმბაი, დელი NCR, ჩენაი, ბანგალორი, ჰაიდერაბადი, პუნი, აჰმედაბადი და კოლხატა).

„ჩვენი ჰიპოთეზა იმის შესახებ, რომ კრეატივს ექნებოდა რეზონანსი, კამპანიის დაწყებისთანავე გამართლდა.“

ის მთლიანად იყო მიმართული მომხმარებლის საჭიროების დაკმაყოფილებასა და მისი ცნობიერების ამაღლებაზე. 

2. იცოდე, სად ატარებენ მომხმარებლები დროს

წარსულში მარკეტინგის მენეჯერებს თავიანთი შეტყობინებების გასავრცელებლად შეზღუდული არხები ჰქონდათ. მიუხედავად იმისა, რომ ეს შეიცვალა, ახალი გამოწვევა გაჩნდა – რომელია საუკეთესო არხი სამიზნე მომხმარებლებამდე მისაღწევად?

მაგალითი 

აზია-წყნარი ოკეანის რეგიონის უმეტეს ნაწილში მობილური სწრაფად ანაცვლებს ტელევიზიას. ეს კი ნიშნავს, რომ აქცენტი მობილურზე უნდა გაკეთდეს. 

როდესაც გუგლმა Tez, მობილური გადასახადების აპლიკაციაზე მუშაობა დაიწყო, მთავარი პრიორიტეტი იყო გადმოტვირთვისა და ტრანზაქციების შესაძლებლობა. უნივერსალური აპლიკაციის კამპანიის დანერგვით, რეფერალებითა და წახალისებებით, Tez-მა უმოკლეს ვადაში 350 მილიონი ტრანზაქცია განხორციელდა. 

„იმის გაგებით, თუ როგორ ურთიერთობენ ადამიანები თითოეულ არხთან, შეგიძლიათ დაგეგმოთ თქვენი ბიუჯეტი სწორად, რათა უზრუნველყოთ ყველაზე საინტერესო და აუდიტორიაზე მორგებული გამოცდილების შექმნა.“

3. კრეატიული პერსონალიზაცია

წარსულში მომხმარებლები ობიექტების როლში იყვნენ, რომელთაც რეკლამების წაკითხვა თუ მოსმენა უპასუხოდ უწევდათ, დღეს კი ისინი მძღოლის რანგში არიან. ისინი იმ ბრენდის მხარეს იხრებიან, რომელიც პატივს სცემს პერსონალიზაციას და თან ამას კრეატიულად აკეთებს.

„თუ გსურთ მომხმარებელთა ჩართულობის გაზრდა, დაამყარეთ პირადი კავშირი მასთან.

ციფრული ტექნოლოგიის უპირატესობა ისაა, რომ უკუკავშირის მიღება რეალურ დროში შეგვიძლია. ეს გვეხმარება გავიგოთ, რა ხდება ბაზარზე და შესაბამისად დავაკორექტიროთ ან მოთხოვნის შესაბამისად, სრულიად შევცვალოთ პროდუქტი. 

მაგალითი

„როდესაც ავსტრალიაში Google Home-ი გავუშვით, გვინდოდა ადგილობრივებისთვის გვეჩვენებინა, თუ როგორ შეიძლება მისი გამოყენება ყოველდღიურ ცხოვრებაში. ჩვენ შევქმენით დინამიკური ექვსწამიანი ვიდეო კამპანია YouTube-ზე. მომხმარებლებს თავიანთი ინტერესების შესაბამისად ეგზავნებოდათ ვიდეოები. მაგალითად, მუსიკის მოყვარულებს აჩვენეს, თუ როგორ დაუკრავს Google Home მათ საყვარელ მელოდიებს, ხოლო გურმანებმა მიიღეს ვიდეოები იმის შესახებ, თუ როგორ დაეხმარება Google Home-ი ინგრედიენტების მოძიებაში. ერთი ვიდეო კონცეფციის 100-ზე მეტ კრეატიულ ვარიაციად გადაქცევით, ჩვენ შევძელით ცნობიერების ამაღლება 11,3%-ით.“

4. დატესტე, დატესტე და კვლავ დატესტე

მუდმივად ცვალებად მედია ლანდშაფტში, მთავარი გამოწვევა კამპანიის გავლენის გაზომვაა. ექსპერიმენტი იქცევა ახალ ნორმად, რაც გვაძლევს შესაძლებლობას გამოვიდეთ სტანდარტიდან და გავზომოთ რისკები, ვიპოვოთ ყველაზე ეფექტიანი არხები.

მაგალითი

დიად იდეას ექსპერიმენტი არ სჭირდება. წვრილმანების დატესტვას კი მნიშვნელოვანი გავლენის მოხდენა შეუძლია, როგორც ეს Google Maps-ის კამპანიისას მოხდა:

გუნდმა უბრალოდ შეამოწმა, იმოქმედებდა თუ არა ცნობიერებაზე ვიდეოს დაწყებამდე სტატიკური, ერთწამიანი ბრენდინგის სურათის ჩვენება. ლიფტში ჩატარებულმა გამოკითხვებმა აჩვენა, რომ ამან საშუალოდ, 10%-ით გაზარდა ცნობადობა. ეს კი ნიშნავს, რომ ექსპერიმენტს აზრი ჰქონდა. 

5. მოჰყევი ამბავს თანმიმდევრულად

კამპანიის ეფექტიანობა განისაზღვრება მისი ყოვლისმომცველი მიდგომით. მაგალითად, ციფრული მედიის ბიუჯეტის განსაზღვრისას, რატომ უნდა დაყოთ ის სხვადასხვა, წვრილ მიზნად, როცა საბოლოოდ, მომხმარებელი ამას ერთ მთლიან კამპანიად აღიქვამს.

მაგალითი

მედია ტექნოლოგიების, „ინსაითების“ და კრეატიულობის ცენტრალიზაციისა და დაკავშირების მიზნით გუგლმა ე.წ. „შიდა შემოქმედებითი ინკუბატორის“ ცნება შემოიღო. გუნდური მუშაობის ამ პრინციპის იდეა არის ის, რომ თითოეული პროდუქტი, დაწყებული უბრალო ფეისბუქ პოსტით დასრულებული კრეატიული ვიდეოთი, დანახული იყოს ერთი პრიზმიდან და საზოგადოებას მიეწოდოს, როგორც სტრუქტურული, ერთიანი ნამუშევარი.

ციფრული მარკეტინგის კურსის შესახებ გაიგე მეტი აქ.

მოამზადა მარიამ ელიაშვილმა